သရေခေတ္တရာ ပြည်မြို့တော်

ပြည်မြို့ သီတာမြန်မာ အထည်ချုပ်စက်ရုံတွင် အလုပ်သမားများ ဆန္ဒပြ

စက်ရုံမှ အသစ်ပြဌါန်းလိုက်သည့် စည်းကမ်းချက်များကို သဘောတူ လက်မှတ်ထိုးစာချုပ်ခိုင်းသဖြင် အလုပ်ရှင်နှင့် အလုပ်သမားများအကြား သဘောထား ကွဲလွဲမှုများဖြစ်ပွားကာ ပဲခူးတိုင်းပြည်ခရိုင်ပြည်မြို့ စက်မှုကွက်သစ်ရှိ သီတာမြန်မာ အထည်ချုပ်စက်ရုံတွင် မတ်လ (၁၇) ရက်နေ့က အလုပ်သမား ခြောက်ဆယ် ကျော်ဆန္ဒပြခဲ့ကြောင်း သိရပါသည်။

 “သပိတ်စခန်းဖွင့်လိုက်ပြီ။ အလုပ်သမားတွေက အချက်ကိုးချက်ကို တောင်းဆိုတယ်။ အားလုံးခြောက် ဆယ်နဲ့ အခုညမရမချင်းတိုက်ပွဲဝင်သွားမယ်ဆိုပြီး အထိုင်သပိတ်လုပ်လိုက်ပြီ”ဟု စက်ရုံဝန်ထမ်း လက်ထောက်ခေါင်းဆောင် မဆွေရီမွန်က ပြောပါသည်။ အဆိုပါစက်ရုံတွင် မတ်လ(၁၆) ရက်နေ့ည ရ နာရီအချိန်က စည်းကမ်းချက် အသစ်များကို လက်မှတ်ထိုးခိုင်းရာ အလုပ်သမားများက လက်မှတ်မထိုးပေးသဖြင့် စက်ရုံတံခါးပိတ်ထားပြီး (၈) နာရီခွဲအချိန်တွင် စက်ရုံနောက်ဖေးပေါက်က ပြန်ခဲ့ရကြောင်း သူမကဆိုသည်။
“သူတို့ပုံနှိပ်စာအုပ် တစ်အုပ်စာလောက်ရှိတဲ့ စည်းကမ်းချက်တွေထုတ်လိုက်တယ်။ အဲဒီစည်းကမ်းချက်တွေကို အပြင်ကိုအထုတ်မခံဘဲ စက်ရုံထဲမှာဘဲတစ်ခါတည်း လက်မှတ်ထိုးခိုင်းတယ်။ လက်မှတ်မထိုးရင်မပြန်ရဘူးဆိုပြီး စက်ရုံတံခါးတွေပိတ်ထားတယ်။ ပြန်တဲ့အခါနောက်ဖေးပေါက်ကထွက်ပြီးပြန်ခဲ့ရတယ်” ဟု သူမကပြောပါသည်။ ထိုသို့ပြန်ခဲ့ရပြီး နောက်တစ်နေ့မတ်လ(၁၇) ရက်နေ့အလုပ်ဆင်းချိန်တွင် စက်ရုံမှ စည်းကမ်းချက်များ ထပ်မံလက်မှတ်ထိုးခိုင်းခဲ့ပြန်သည်။ စက်ရုံမှနေ့လည်(၁၂) နာရီမတိုင်မီအချိန်အထိ စည်းကမ်းချက် လက်မှတ်ထိုးမပေးသူများကို အလုပ်မဆင်းရန်သတ်မှတ်ခဲ့ကြောင်းလည်း သိရပါသည်။ “ဆယ့်နှစ်နာရီမတိုင်ခင် လက်မှတ်မထိုးရင် ကယ်ဆယ်လို့ပြောပါတယ်။ ထမင်းစားချိန်မှာ တစ်ခါတည်းလက်မှတ်ထိုးခိုင်းတာ။ ငါးဆယ့်နှစ်ဦးလက်မှတ်ထိုးမပေးဘဲထိုင်နေကြတာ။ လက်မှတ်ထိုးတဲ့လူတွေကလည်း ဘာမသိညာမသိနဲ့လက်မှတ်ထိုးလိုက်ရတာ”ဟု သူမကပြောပါသည်။ လက်မှတ်ထိုးပေးလိုက်သော စက်ရုံအလုပ်သမားနှစ်ဆယ်ခန့်မှာ စက်ရုံအတွင်းတံခါးပိတ်ခံထားရသဖြင့် အပြင်သို့ထွက်ခွင့်မရကြောင်းလည်း သူမကပြောပါသည်။ ၄င်းအထည်ချုပ်စက်ရုံတွင် စည်းကမ်းတင်းကြပ်ကာ ဒဏ်ကြေးများဖြတ်တောက်ခြင်း အချိန်ပိုကြေးမရှင်းပေးခြင်းတို့ကြောင်း အခြေခံလစာပင် အပြည့်အ၀မရကြောင်း စက်ရုံအလုပ်သမား မအေမီထွန်းက ပြောပါသည်။ “အခြေခံလစာခြောက်သောင်းတောင်အပြည့်မရဘူး။ ပိတ်ရက်အလုပ်ဆင်းရင် နှစ်ဆပေးရမှာကိုလည်းမပေးဘူး။ ညဘက်အချိန်ပိုကိုးနာရီက ခြောက်နာရီအထိဆင်းထားတာတောင် မနက်ပိုင်းဆင်းတာနဲ့ချေတယ်။ မနက်ပိုင်းခွင့်ယူခွင့်ပြုတယ်ဆိုပြီး အိုတီကြေးမပေးဘူး”ဟု သူမကဆိုသည်။ သင်တန်းသားအဖြစ်မှ စက်ရုံအလုပ်သမားအဖြစ် ကူးပြောင်းသည့်အချိန်တွင် ကုမ္ပဏီတိုင်းတွင်ရှိသော စည်းကမ်းသဘောတရားအတိုင်း စည်းကမ်းချက်များထုတ်ပြန်ခြင်းဖြစ်သော်လည်း သဘောထားကွဲလွဲမှုများဖြစ်ခဲ့ကြောင်း စက်ရုံနည်းစနစ်ဆိုင်ရာပညာရှင် ဂျပန်နိုင်ငံသားတစ်ဦးက ပြောပါသည်။
 “သင်တန်းကာလတုန်းကတော့ ဆယ်ယောက် ဆယ့်တစ်ယောက်နဲ့ တစ်နေ့အထည်လေးသုံးလေးထည်ထွက်တာရှိတယ်။ အခုလုပ်ငန်းတွေဖြစ်လာတော့ ကုမ္မဏီစည်းကမ်းချက်အနေနဲ့ သတ်မှတ်ချက်တွေရှိလာတယ်။ ကုမ္ပဏီထဲကို ဟန်းဖုန်းတွေယူမ၀င်ရဘူး။ ကိုယ်ရေးကိုယ်တာပစ္စည်းတွေထားခဲ့ရမယ်။ ကုမ္ပဏီတိုင်းမှာရှိတဲ့ စည်းကမ်းချက်သဘောတရားအတိုင်းထုတ်ပြန်တာ”ဟု ဆိုသည်။ မတ်လ(၁၆) ရက်နေ့ညက စက်ရုံစည်းကမ်းကို လက်မှတ်မထိုးပေးသူများအား စက်ရုံဝန်းအတွင်းတံခါးပိတ်ထားသည်ဟူသော အလုပ်သမားများ၏ စွပ်စွဲချက်ကိုသူကငြင်းပါသည်။
“အထင်မှားနေပြီထင်တယ်။ မနေ့ကစက်ရုံပြောင်းတယ်။ အားလုံးပင်ပန်းသွားတဲ့အတွက် သူဌေးက ညနေငါးနာရီမှ ညစာကျွေးတာ။ ပြီးတော့မှပြန်ပါလို့ပြောတာ။ အတင်းအကြပ် မပြန်ခိုင်းတာမျိုးမဟုတ်ပါဘူး”ဟု ပြောပါသည်။ အဆိုပါစည်းကမ်းချက်များ မထုတ်ပြန်မီလွန်ခဲ့သောတစ်လခန့်ကတည်းက အလုပ်သမားများအား ဖတ်ပြပေးထားကြောင်းလည်း သူကပြောပါသည်။ အချိန်လုပ်ခများနှင့်ပတ်သတ်ပြီး နိုင်ငံတော်ရုံးပိတ်ရက်တိုင်း ရှင်းပေးကြောင်းသူကပြောပါသည်။ ပရိပက္ခဖြစ်နေသော အလုပ်သမားများမှ စည်းကမ်းချက်စာ ချုပ်များကို လက်မှတ်ထိုးပါက အလုပ်ပြန်လည်ဆင်းနိုင်သည်ဟုလည်း သူကပြောပါသည်။

 ပြည့်သဲမောင်(ပြည်)

 

နောက်ဆုံးရ သတင်းများ
Find Us On Facebook
Visitors
006500
Visit Today :
This Month :
Who's Online :
Your IP Address: 162.158.79.142
Android မှ ဖတ်ရှုရန်

Copyright © 2014 http://www.pyaycity.com. All Rights Reserved.
Powered By Webmaster Myanmar